uḌte hue parindon ke shah-par sameT luun
ji chahta hai shaam ke manzar sameT luun
lab par uga.un us ke dhanak phuul qahqahe
a.ankhon men us ki phaila samundar sameT luun
pahle milan ka phuul khile ruuh men tiri
bahon men tujh ko le ke tire Dar sameT luun
mumkin nahin hai phir bhi main ye chahta huun kyuun
aḳhbar par sulagte hue ghar sameT luun
chadar duun apne ahd ki zainab ko aur baḌhun
nezon pe jo saje hain sabhi sar sameT luun
Leave a Reply