mujh ko daulat mili tire gham ki
kya haqiqat hai ab do-alam ki
main ne gardan jahan jahan ḳham ki
ik tajalli hai nur-e-paiham ki
husn zinat hai ahd-e-mub.ham ki
ishq hurmat hai naqsh-e-mohkam ki
naala pahuncha ba-hadd-e-ḳhamoshi
intiha hai junun ke aalam ki
kyuun na vaqif hon raz-e-hasti se
mujh ko hasil hai ma.arifat gham ki
jo tha maz.har vahi bana parda
raz-dari ye tere mahram ki
tur-e-dil par hai nuur ki barish
kitni azmat hai chashm-e-pur-nam ki
un ke partav ka nuur hain donon
ek hasti hai mahr o shabnam ki
sab ko hairat hai do-jahan manga
mujh ko hasrat ki aarzu kam ki
kar raha huun dua ki dard baḌhe
fikr karta huun roz marham ki
dil ḳhuda se laga ‘bashir’ ab tu
paa.i barkat hai ism-e-azam ki
Leave a Reply