ye dard-e-zindagi kis ki amanat hai kise de duun
koi varis nahin is ka mata-e-raegan hai ye
masiha ab na aenge yahi nashtar rag-e-jan men
khalish banta rahega meri sanson men nihan hai ye
khudaya ham se pahle log bhi jo is zamin par the
yunhi pamal hote the, jo is ke baad aenge
umid-e-subh ke khanjar se zakhmi ho ke jaenge?
(kahan ja kar rukega qafila in sogvaron kaa)
ye phir bhi tere bande hain tiri hi hamd gaenge
inhen ankhen to de di hain basarat bhi inhen de de
tujhe sab dhundte hain is tarah andhe hain sab jaise
isi kore varaq par kuchh ibarat bhi unhen de de
khada hai munh kiye mashriq ki janib, koi maghrib ki
(miri tasvir men in chikhte rangon ki aisi kya zarurat thii)
khudaya bakhsh de in be-gunahon ke gunahon ko
ye maani dhundte hain kashmakash men raat aur din ki
haqiqat ko samajhna chahte hain saal aur sin ki
ye sab majbur hain in par dar-e-tauba khula rakhna
ye duniya khauf aur lalach pe jis ki niiv rakkhi hai
isi mitti se phute hain isi dharti ke paale hain
ujala bhi yahi hain is zamin ka aur andhera bhi
yahi shahkar hain tera yahi paanv ke chhale hain
(ye sab ke sab libas-e-fakhira men maili bheden hain)
ilah-al-alamin in ki khata se dar-guzar karna
bahut mazur hain ye khud-nigar apni jibillat se
muqaddar in ka hai shaam o sahar ko roz sar karna
masai in ki sim-o-zar ke dheron men badal dena
tire paas aaen, moti ke mahl mehnat ka phal dena
Leave a Reply