Habeeb Ahmad Siddiqui
un nigahon ko ajab tarz-e-kalam aata hai
aisa lagta hai baharon ka payam aata hai
marhala hota hai jab dar-o-rasan ka darpesh
qur.a-e-fal ham aison hi ke naam aata hai
ai mire naseh-e-mushfiq kabhi ye bhi socha
kaun duniya men ḳhushi se tah-e-dam aata hai
bada-noshi men bhi hai kaif-e-sukun-baḳhsh magar
haa.e vo kaif jo be-minnat-e-jam aata hai
apni hansti ka bhi ehsas jahan ho na sake
alam-e-hosh men ik vo bhi maqam aata hai
pesh-dasti hai ḳharabat-e-jahan ka dastur
takte rahne se kahin haath men jaam aata hai
ahl-e-himmat ke hasin ḳhvabon ki nikli ta.abir
ibn-e-adam ko sitaron ka salam aata hai
Leave a Reply