malāhat javānī tabassum ishārā
inhīñ kāfiroñ ne to shā.er ko maarā
mohabbat bhī zālim ajab bebasī hai
na vo hī hamāre na dil hī hamārā
maiñ tinkoñ kā dāman pakaḌtā nahīñ huuñ
mohabbat meñ Duubā to kaisā sahārā
mujhe sat.h-e-ġham par abhī tairne do
maiñ Duubā to Duubā taġhazzul kā taarā
jo bismil banā de vo qātil tabassum
jo qātil banā de vo dilkash nazārā
mohabbat kā bhī khel nāzuk hai kitnā
nazar mil ga.ī aap jiite maiñ haarā
tumhārī umañgoñ kā kyā pūchhnā hai
bahāreñ tumhārī gulistāñ tumhārā
tumhārā ‘nushūr’ aur tumhārā taḳhayyul
mohabbat tumhārī to shā.er tumhārā