kitne imkan the jo ḳhvabon ke sahare dekhe
mavara the jo nazar se vo nazare dekhe
parde uThte ga.e ankhon se to rafta rafta
barg-e-gul barf men patthar men sharare dekhe
dil pe us vaqt khula hausla-e-gham ka jamal
apne har rang men jab ruup tumhare dekhe
asare jaate rahe aas abhi baaqi hai
pau bhi phuTegi jahan Dubte taare dekhe
dil ko ḳhuun karne ki hasrat ho use bhi shayad
sahab-e-sada agar rang hamare dekhe
ḳhub-o-na-ḳhub men kya farq karen ham ki yahan
jab hava palTi to muḌte hue dhare dekhe
mujhe is bazm men kahna to bahut kuchh tha ‘ziya’
bujh ga.e lafz jab ankhon ke ishare dekhe
Leave a Reply