Sarshar Siddiqui
ḳhalvat-e-zat hai aur anjuman-ara.i hai
bazm si bazm hai tanha.i si tanha.i hai
vo hai ḳhamosh magar us ke sukut-e-lab par
raqs karta hua ik alam-e-goya.i hai
jab andhere miri ankhon ka lahu chaaT chuke
tab in ankhon men rifaqat ki chamak aa.i hai
ab ḳhuda us ko banaya hai to yaad aata hai
jaise us but se to barson ki shanasa.i hai
niind TuuTi hai to ehsas-e-ziyan bhi jaaga
dhuup divar se angan men utar aa.i hai
pas-e-divar-e-abad dekh raha huun ai dost
meri ankhon men mire ahd ki bina.i hai
mere chehre pe hai vo aks ki a.ina-e-zat
kabhi mera kabhi ḳhud apna tamasha.i hai
mere sach men to koi khoT nahin tha ‘sarshar’
phir ye kyuun zahr se tiryak ki bu aa.i hai
Leave a Reply