kahan vo ab lutf-e-bahami hai mohabbaton men bahut kami hai
chali hai kaisi hava ilahi ki har tabiat men barhami hai
miri vafa men hai kya tazalzul miri itaat men kya kami hai
ye kyuun nigahen phiri hain mujh se mizaj men kyuun ye barhami hai
vahi hai fazl-e-khuda se ab tak taraqqi-e-kar-e-husn o ulfat
na vo hain mashq-e-sitam men qasir na khun-e-dil ki yahan kami hai
ajiib jalve hain hosh dushman ki vahm ke bhi qadam ruke hain
ajiib manzar hain hairat-afza nazar jahan thi vahin thami hai
na koi takrim-e-bahami hai na pyaar baaqi hai ab dilon men
ye sirf tahrir men dear sir hai ya janab-e-mukarrami hai
kahan ke muslim kahan ke hindu bhulai hain sab ne agli rasmen
aqide sab ke hain tin-terah na gyarahvin hai na ashtami hai
nazar miri aur hi taraf hai hazar rang-e-zamana badle
hazar baten banae naseh jami hai dil men jo kuchh jami hai
agarche main rind-e-mohtaram huun magar ise shekh se na puchho
ki un ke aage to is zamane men saari duniya jahannami hai
Leave a Reply