asrarul-haq-majaz

Nau-Jawan Se

jalal-e-atish-o-barq-o-sahab paida kar

ajal bhi kaanp uthe vo shabab paida kar

tire khiram men hai zalzalon ka raaz nihan

har ek gaam par ik inqalab paida kar

sada-e-tisha-e-mazdur hai tira naghma

tu sang-o-khisht se chang-o-rubab paida kar

bahut latif hai ai dost tegh ka bosa

yahi hai jan-e-jahan is men aab paida kar

tire qadam pe nazar aae mahfil-e-anjum

vo bankpan vo achhuta shabab paida kar

tira shabab amanat hai saari duniya ki

tu khar-zar-e-jahan men gulab paida kar

sukun-e-khab hai be-dast-o-pa zaifi ka

tu iztirab hai khud iztirab paida kar

na dekh zohd ki tu ismat-e-gunah-alud

gunah men fitrat-e-ismat-maab paida kar

tire jilau men nai jannaten nae dozakh

nai jazaen anokhe azaab paida kar

sharab khinchi hai sab ne gharib ke khuun se

tu ab amiir ke khuun se sharab paida kar

gira de qasr-e-tamaddun ki ik fareb hai ye

utha de rasm-e-mohabbat azaab paida kar

jo ho sake hamen pamal kar ke aage badh

jo ho sake to hamara javab paida kar

bahe zamin pe jo mera lahu to gham mat kar

isi zamin se mahakte gulab paida kar

tu inqalab ki aamad ka intizar na kar

jo ho sake to abhi inqalab paida kar

More Poems

Leave a Comment