khoTa Sikka Ek Din Chal Bhi Sakta Hai

khoTā sikka ik din chal bhī saktā hai

raavī kā andāz badal bhī saktā hai

do pal kā hai saath magar tanhā.ī meñ

andesha rusvā.ī kā pal bhī saktā hai

māchis kī ik tiilī jaisī āñkhoñ se

hadd-e-nazar kā manzar jal bhī saktā hai

duniyā us kī majbūrī meñ shāmil hai

zer-e-zamīñ vo rah kar phal bhī saktā hai

nekī kā dariyā se gahrā rishta hai

sho.aloñ se vo bach ke nikal bhī saktā hai

us kī chāhat meñ lāzim hai shiddat bhī

vo basharī paikar meñ Dhal bhī saktā hai

Leave a Comment