zamin kahin hai miri aur asman kahin
bhaTak raha huun ḳhalaon ke darmiyan kahin
mira junun hi mira aḳhiri ta.aruf hai
main chhoḌ aaya huun apna har ik nishan kahin
isi liye main rivayat se munharif na hua
ki chhoḌ de na mujhe mera ḳhandan kahin
likhi ga.i hai miri fard-e-jurm aur jagah
liye ga.e hain gavahan ke bayan kahin
hava-e-tund se laḌna miri jibillat hai
Dubo hi de na mujhe ye miri uḌaan kahin
dil-e-hazin ka ajab haal hai mohabbat men
koi ghazab hi na Dha de ye na-tavan kahin
main dastan-e-mohabbat ise suna aaya
kahin ka zikr tha lekin kiya bayan kahin
hava-e-shahr tujhe raas hi nahin ‘asif’
misal-e-qais tu sahra men ḳhaak chhan kahin
Leave a Reply