Allama Iqbal
sach kah duun ai barhaman gar tu bura na maane
tere sanam-kadon ke but ho gae purane
apnon se bair rakhna tu ne buton se sikha
jang-o-jadal sikhaya vaaiz ko bhi khuda ne
tang aa ke main ne akhir dair o haram ko chhoda
vaaiz ka vaaz chhoda chhode tire fasane
patthar ki muraton men samjha hai tu khuda hai
khak-e-vatan ka mujh ko har zarra devta hai
aa ghairiyat ke parde ik baar phir utha den
bichhdon ko phir mila den naqsh-e-dui mita den
suuni padi hui hai muddat se dil ki basti
aa ik naya shivala is des men bana den
duniya ke tirathon se uncha ho apna tirath
daman-e-asman se is ka kalas mila den
har subh uth ke gaaen mantar vo mithe mithe
saare pujariyon ko mai piit ki pila den
shakti bhi shanti bhi bhagton ke giit men hai
dharti ke basiyon ki mukti priit men hai
Leave a Reply