Tajdar Adil
vo gham miri palkon se numayan bhi nahin hai
yuun jashn hua hai ki charaghan bhi nahin hai
patthar bhi koi marne vaala nahin milta
a.ina kisi aks se hairan bhi nahin hai
ik josh-e-talab hai ki use DhunD raha huun
mil ja.ega vo shaḳhs ye imkan bhi nahin hai
shahron se huiin ishq ki be-tabiyan ruḳhsat
divangi-e-dil ko bayaban bhi nahin hai
lauT aa.ega ik roz yahi ḳhvab men apne
yuun us se ba-zahir koi paiman bhi nahin hai
ankhon men bahut roz se aansu nahin aa.e
dariya ka mire dasht men imkan bhi nahin hai
mat dekh mire chehre pe is hijr ka manzar
nazzara tiri aankh ke shayan bhi nahin hai
le ja.engi manzil pe usi dost ki ankhen
raste men musafir ke charaghan bhi nahin hai
ik dard-e-tamanna ko liye phirta huun ‘adil’
is sachchi kahani ka to unvan bhi nahin hai
Leave a Reply