Arsh Siddiqui
darvaza tire shahr ka va chahiye mujh ko
jiina hai mujhe taaza hava chahiye mujh ko
azar bhi the sab se ziyada miri jaan par
altaf bhi auron se siva chahiye mujh ko
vo garm hava.en hain ki khulti nahin ankhen
sahra main huun badal ki rida chahiye mujh ko
lab si ke mire tu ne diye faisle saare
ik baar to bedard suna chahiye mujh ko
sab ḳhatm hue chaah ke aur ḳhabt ke qisse
ab puchhne aa.e ho ki kya chahiye mujh ko
haan chhuTa mire haath se iqrar ka daman
haan jurm-e-za.ifi ki saza chahiye mujh ko
mahbus hai gumbad men kabutar miri jaan ka
uḌne ko falak-bos faza chahiye mujh ko
samton ke tilismat men gum hai miri ta.id
qibla to hai ik qibla-numa chahiye mujh ko
main pairvi-e-ahl-e-siyasat nahin karta
ik rasta in sab se juda chahiye mujh ko
vo shor tha mahfil men ki chilla uTha ‘va.iz’
ik jam-e-mai-e-hosh-ruba chahiye mujh ko
taqsir nahin ‘arsh’ koi samne phir bhi
jiita huun to jiine ki saza chahiye mujh ko
Leave a Reply