Darwaza Tere Shahr Ka Wa Chahiye Mujhko

darvāza tire shahr kā vā chāhiye mujh ko

jiinā hai mujhe taaza havā chāhiye mujh ko

āzār bhī the sab se ziyāda mirī jaañ par

altāf bhī auroñ se sivā chāhiye mujh ko

vo garm havā.eñ haiñ ki khultī nahīñ āñkheñ

sahrā maiñ huuñ bādal kī ridā chāhiye mujh ko

lab sī ke mire tū ne diye faisle saare

ik baar to bedard sunā chāhiye mujh ko

sab ḳhatm hue chaah ke aur ḳhabt ke qisse

ab pūchhne aa.e ho ki kyā chāhiye mujh ko

haañ chhūTā mire haath se iqrār kā dāman

haañ jurm-e-za.īfī kī sazā chāhiye mujh ko

mahbūs hai gumbad meñ kabūtar mirī jaañ kā

uḌne ko falak-bos fazā chāhiye mujh ko

samtoñ ke tilismāt meñ gum hai mirī tā.īd

qibla to hai ik qibla-numā chāhiye mujh ko

maiñ pairvi-e-ahl-e-siyāsat nahīñ kartā

ik rāsta in sab se judā chāhiye mujh ko

vo shor thā mahfil meñ ki chillā uThā ‘vā.iz’

ik jām-e-mai-e-hosh-rubā chāhiye mujh ko

taqsīr nahīñ ‘arsh’ koī sāmne phir bhī

jiitā huuñ to jiine kī sazā chāhiye mujh ko

Leave a Comment