dekh ab apne hayule ko fana hote hue
tu ne bandon se laḌa.i ki ḳhuda hote hue
faisla hona hai jo kuchh aaj hona chahiye
muddaten lag ja.engi mahshar bapa hote hue
sochta rahta huun kab badlegi gulshan ki hava
dekhta rahta huun lamhon ko hava hote hue
hai bala ab kaun si baaqi jo mujh par aa.egi
main kisi se kyuun Darun be-dast-o-pa hote hue
dekhte rahte ho sab kuchh bolte kuchh bhi nahin
kis qadar bedard ho dard-ashna hote hue
zard chehra surḳh ankhen kanpte be-sabr honT
ye sabhi kuchh aur dil-e-be-mudda.a hote hue
shadman huun apni sab majburiyon ke bavajud
mutma.in huun ruuh ke andar ḳhala hote hue
jin ko tu dhutkarta hai vo bhi tere saa.e hain
tu ne itna bhi nahin socha ḳhafa hote hue
aaj ki tabindagi se kal ka andaza na kar
dekh patton ko daraḳhton se juda hote hue
muntazir huun kaun aata hai koi vahshi ki chor
sun raha huun phir se darvaze ko va hote hue
Leave a Reply