Zaheer Kashmiri
marna azaab tha kabhi jiina azaab tha
mera mushir ishq sa ḳhana-ḳharab tha
dil mar miTa tilavat-e-ruḳhsar-e-yar men
marhum tiflagi se hi ahl-e-kitab tha
socha to is habib ko paaya qarib-e-jan
dekha to astin men chhupa aftab tha
vo bargah meri vafa ka javaz thi
is astan ki ḳhaak mira hi shabab tha
meri har ek sub.h thi aghosh-e-dilbari
meri har ek shaam ka unvan sharab tha
dil bhi sanam-parast nazar bhi sanam-parast
is ashiqi men ḳhana hama aftab tha
kab is siyah-baḳht ne chhoḌa kisi ka saath
dasht-e-junun men saaya mira ham-rikab tha
tu kab ma.al-e-jaur-o-jafa ko samajh saka
tera jamal tere liye bhi hijab tha
jis daur ko faqih ne isyan samajh liya
us daur men to pi ke bahakna savab tha
vo husn kis qadar adab-amoz tha ‘zahir’
qad ḳhama-e-ravan tha to chehra kitab tha
Leave a Reply