dil jhuka maail tabi.at ho gai
aaj bismillah ulfat ho gai
mahv dil se sab shikayat ho gai
samne jab un ki surat ho gai
mera hal-e-zar to dekha magar
ye na puchha kyuun ye halat ho gai
vo fareb-e-naz de kar le gae
kitni arzan dil ki qimat ho gai
dil men jab tak aah thi ik baat thi
lab tak aate hi hikayat ho gai
jab na daala us ne aa kar koi phuul
gul hamari sham-e-turbat ho gai
fitna-sazi tak jo thi mashq ḳhiram
rafta rafta vo qayamat ho gai
kaisi matlab-ashna thi chashm-e-shoḳh
dil uḌaya aur champat ho gai
chashm pur nam ne kiya ifsha raaz
abru-e-zabt gharat ho gai
dil ki chalon ka natija ye hua
vaqt se pahle qayamat ho gai
de diya dil jis ko ham ne de diya
ho gai jis se mohabbat ho gai
kah gae ‘ahsan’ ke munh par aaj vo
teri surat se bhi nafrat ho gai