Nale Majburon Ke Khaali Nahin Jaane Wale

naale majbūroñ ke ḳhālī nahīñ jaane vaale

haiñ ye sotā huā insāf jagāne vaale

had se Takrātī hai jo shai vo palaTtī hai zarūr

ḳhud bhī ro.eñge ġharīboñ ko rulāne vaale

chup hai parvāna to kyā sham.a ko ḳhud hai iqrār

aap hī jalte haiñ auroñ ko jalāne vaale

‘ārzū’ zikr zabānoñ pe hai ibrat ke liye

miTne vaale haiñ na baaqī haiñ miTāne vaale

Leave a Comment