yaar aaya hai ahval-e-dil-e-zar dikhao
iisa ko zara halat-e-bimar dikhao
aa jaao bas ab raah na ai yaar dikhao
mushtaq huun mushtaq huun didar dikhao
aalam hai so hai hijr men yaan josh-e-junun ka
sahra mujhe dikhlao ki gulzar dikhao
farda-e-qayamat ka na iqrar karo jaan
lo hashr sahi aaj hi didar dikhao
ashiq hain bahut ek to chun kar koi mujh sa
pushte ki tarah pusht-ba-divar dikhao
aalam nazar aa jaa.e bahar aur ḳhizan ka
ham zard hon tum phuul se ruḳhsar dikhao
talvar lagao mujhe goli se na maaro
til Dhank lo aur abru-e-ḳhamdar dikhao
har dam mutaqazi hai yahi hasrat-e-didar
phir ek nazar jalva-e-dildar dikhao
farmate ho ashiq hain mire tujh se hazaron
ai jaan ziyada nahin do-char dikhao
ishq abru o mizhgan ka buto saath hai dam ke
ḳhanjar mujhe dikhlao ki talvar dikhao
main qabr se bhi ‘rind’ yahi kahta uThunga
mushtaq huun mushtaq huun didar dikhao
Leave a Reply