Poet
halat-e-dil vahi rahi maqsad-e-dil ko pa ke bhi
ham to sukun na pa sake un ke qarib ja ke bhi
izn-e-nazara to diya jur.at-e-did chhin li
vo kabhi samne na aa.e ruḳh se hijab uTha ke bhi
dil hai na zauq-e-arzu koi talab na justuju
ab vo karenge kya mujhe sahib-e-dil bana ke bhi
pas-e-raza-e-dost ko ahl-e-vafa se puchhiye
kuchh na zaban se kah sake un ka ishara pa ke bhi
khul gaya raz-e-hal-e-dil jab vo harim-e-naz men
ham se nazar chura.iye sab se nazar mila ke bhi
yuun bhi ik imtihan sahi jazb-e-darun-e-ishq ka
kuchh dinon dekh lijiye dil se hamen bhula ke bhi
kam hui kya fasurdagi ‘kaif’-e-alam-nasib ki
aap ne dekh to liya barha muskura ke bhi
Leave a Reply