nahin hai amn ka duniya men ab maqam koi
khuda khuda kahe koi ki raam raam koi
mire banae to banta nahin hai kaam koi
vo karsaz kare us ka intizam koi
na hoga bazm ka baton se intizam koi
khud apni baat pe tujh ko nahin qayam koi
tumhare ho ke jo ham zillaten uthate hain
zalil hoga kisi ka na yuun ghulam koi
uthao tegh saza do raqib-e-mufsid ko
nasihaton se hua hai kab intizam koi
chhuri se rahm kare pahle kis par ab sayyad
koi qafas men tadapta hai zer-e-dam koi
ye mujh se aankh milata nahin hai kyuun saaqi
mire nasib ka shayad nahin hai jaam koi
jo naam lete hain tera vo qatl hote hain
nahin marega jo lega na tera naam koi
kuchh aur kijiye tadbir kaam ki ‘raghib’
ki haae haae se banta nahin hai kaam koi
Leave a Reply