har kaḌe vaqt pe a.ina dikhaya hai mujhe
zindagi tu ne baḌe pyaar se barta hai mujhe
baḌh ke chume hain gham-e-ishq ne bhi mere qadam
gham-e-dauran ne bhi ankhon pe biThaya hai mujhe
rah-e-pur-pech pe hai zulf-e-rasa ka dhoka
dasht-e-aghosh-e-tamanna nazar aaya hai mujhe
apne gham-ḳhvar ke ashkon ko taka karta huun
gardish-e-vaqt ne palkon pe sajaya hai mujhe
ab kisi dard ka shikva na kisi gham ka gila
meri hasti ne baḌi der men paaya hai mujhe
main gham-e-dahr ki chadar men chhupa baiTha tha
raat bhar aa ke tiri yaad ne DhunDa hai mujhe
Leave a Reply