Hasrat Mohani
kya vo ab nadim hain apne jaur ki rudad se
laae hain merath jo akhir mujh ko faizabad se
sair-e-gul ko aai thi jis dam savari aap ki
phuul uttha tha chaman fakhr-e-mubarakbad se
har kas-o-na-kas ho kyunkar kam-gar-e-be-khudi
ye hunar sikha hai dil ne ik bade ustad se
ik jahan mast-e-mohabbat hai ki har su bu-e-uns
chhai hai un gesuon ki nikhat-e-barbad se
ab talak maujud hai kuchh kuchh laga laae the ham
vo jo ik lapka kabhi na khak-e-jahan abad se
dava-e-taqva ka ‘hasrat’ kis ko aata hai yaqin
aap aur jaate rahen pir-e-mughan ki yaad se
Leave a Reply