Hasan Abbas Raza
ek be-nam sa Dar siine men aa baiTha hai
jaise ik bheḌiya har dar se laga baiTha hai
ek dhaḌka sa laga rahta hai luT jaane ka
goya pahre pe koi ḳhvaja-sara baiTha hai
hurmaten san.at-e-ahan ki tarah bikti hain
jis ko dekho vo ḳharidar bana baiTha hai
aur kya rab se vo mangenge fazilat jin ke
zehn kore hain magar sar pe huma baiTha hai
ab ‘hasan’ milta hai bazar-e-ziyan men aksar
aisa lagta hai koi ḳhvab ganva baiTha hai
Leave a Reply