nafas ki amad-o-shud ko vabal kar ke bhi
vo ḳhush nahin hai hamara ye haal kar ke bhi
ajab tha nashsha-e-varaftagi-e-vasl use
vo taza-dam raha mujh ko niDhal kar ke bhi
hamen aziiz hamesha rahi hai nisbat-e-ḳhak
ye sar jhuka raha kasb-e-kamal kar ke bhi
lo ham na kahte the ham ko nahin umid-e-javab
lo ham ne dekh liya hai saval kar ke bhi
ye ek umr purani sharab hai yaaro
ḳhumar-e-hijr rahega visal kar ke bhi
usi ke naam ka sajda kiya musalle par
usi ka zikr kiya hai dhamal kar ke bhi
sharab dana-e-angur se barabar khinch
par ek kuuza kashid-e-ḳhayal kar ke bhi
Leave a Reply