Josh Malsiani
jitne the tire jalve sab ban ga.e but-ḳhane
ab chashm-e-tamasha.i kyuun kar tujhe pahchane
asrar haqiqat ke samjhe nahin farzane
taqsir to thi un ki maare ga.e divane
mastan-e-mohabbat ne duniya men yahi dekha
TuuTe hue paimane TuuTe hue mai-ḳhane
phulon ki hansi se bhi dil jin ka nahin khilta
un ko bhi hansate hain hanste hue paimane
vo haal suna.un kya jo ghair-mukammal hai
ab tak ki to main janun aage ki ḳhuda jaane
jhagḌa na kabhi uThta tu-tu na kabhi hoti
kuchh shaiḳh hai divana kuchh rind hain divane
vo mujh pe karam-farma hoga ki nahin hoga
ya us ko ḳhuda jaane ya meri qaza jaane
ham kahte rahe jab tak rudad mohabbat ki
hanste rahe farzane rote rahe divane
samjha tha jinhen apna jab un ki ravish ye hai
auron ki shikayat kya begane to begane
vahshat to nahin mujh ko ai ‘josh’ magar phir bhi
yaad aate hain rah rah kar chhoḌe hue virane
Leave a Reply