Nama-E-Jaanan

muddaton baad mila nama-e-janan lekin

na koi dil ki hikayat na koi pyaar ki baat

na kisi harf men mahrumi-e-jan ka qissa

na kisi lafz men bhule hue iqrar ki baat

na kisi satr pe bhige hue kajal ki lakir

na kahin zikr judai ka na didar ki baat

bas vahi ek hi mazmun ki mire shahr ke log

kaise sahme hue rahte hain gharon men apne

itni be-nam khamoshi hai ki divane bhi

koi sauda nahin rakhte hain saron men apne

ab qafas hi ko nasheman ka badal jaan liya

ab kahan taqat-e-parvaz paron men apne

vo jo do chaar subu-kash the ki jin ke dam se

gardish-e-jam bhi thi raunaq-e-mai-khana bhi thi

vo jo do chaar nava-gar the ki jin ke hote

hurmat-e-naghma bhi thi jurat-e-rindana bhi thi

koi maqtal koi zindan koi pardes gaya

chand hi the ki ravish jin ki judagana bhi thi

ab to bas burda-farosh hai jidhar bhi jaao

ab to har kucha-o-ku misr ka bazar lage

sar-e-darbar sitada hain bayazen le kar

vo jo kuchh dost kabhi sahab-e-kirdar lage

ghairat-e-ishq ki kal mal-e-tijarat men na thi

aaj dekho ki hain ambar ke ambar lage

aisa aseb-zada shahr ki dekha na suna

aisi dahshat hai ki patthar hue sab ke baazu

dar-o-divar-e-kharabat vahi hain lekin

na kahin qulqul-e-mina hai na gul-bang-e-subu

be-dili sheva-e-arbab-e-mohabbat thahra

ab koi aae ki jaae ”tananahu-yahu”

Leave a Comment