ghubar-e-dard men rah-e-najat aisa hi
raha hai koi mire saath saath aisa hi
to bhuul paane men dushvariyan bahut hongi
kiya hai pyaar had-e-mumkinat aisa hi
baras guzar ga.e us se juda hue lekin
ajiib bain hai mauj-e-furat aisa hi
use bhi os men Duuba hua laga tha badan
mujhe bhi kuchh hua mahsus raat aisa hi
main jis se ḳhauf-zada tha shurua se aḳhir
tamasha kar ga.i ye ka.enat aisa hi
koi bhi rang mayassar na aa saka to phir
qubul kar liya rang-e-hayat aisa hi
Leave a Reply