marg-e-israfil par aansu bahao
vo khudaon ka muqarrab vo khudavand-e-kalam
saut-e-insani ki ruh-e-javedan
asmanon ki nida-e-be-karan
aaj sakit misl-e-harf-e-na-tamam
marg-e-israfil par aansu bahao
aao israfil ke is khvab-e-be-hangam par aansu bahaen
aramida hai vo yuun qarna ke paas
jaise tufan ne kinare par ugal daala use
reg-e-sahil par chamakti dhuup men chup chaap
apne suur ke pahlu men vo khvabida hai
us ki dastar us ke gesu us ki riish
kaise khak-aluda hain
the kabhi jin ki tahen bud-o-nabud
kaise is ka suur is ke lab se duur
apni chikhon apni fariyadon men gum
jhilmila uthte the jis se dair-o-zud
marg-e-israfil par aansu bahao
vo mujassam hamhama tha vo mujassam zamzama
vo azal se ta abad phaili hui ghaibi sadaon ka nishan
marg-e-israfil se
halqa dar halqa farishte nauha gar
ibn-e-adam zulf-dar-khak-o-nazar
hazrat-e-yazdan ki ankhen gham se taar
asmanon ki safir aati nahin
alam-e-lahut se koi nafir aati nahin
marg-e-israfil se
is jahan par band avazon ka rizq
mutribon ka rizq aur sazon ka rizq
ab mughanni kis tarah gaega aur gaega kya
sunne valon ke dilon ke taar chup
ab koi raqqas kya thirkega lahraega kya
bazm ke farsh-o-dar-o-divar chup
ab khatib-e-shahr farmaega kya
masjidon ke astan-o-gumbad-o-minar chup
fikr ka sayyad apna daam phailaega kya
tairan-e-manzil-o-kohsar chup
marg-e-israfil hai
gosh-e-shanva ki lab-e-goya ki maut
chashm-e-bina ki dil-e-dana ki maut
thi isi ke dam se durveshon ki saari hav-hu
ahl-e-dil ki ahl-e-dil se guftugu
ahl-e-dil jo aaj gosha-gir-o-surma-dar-gulu
ab tana ta-hu bhi ghaeb aur ya-rab ha bhi gum
ab gali kuchon ki har aava bhi gum
ye hamara akhiri malja bhi gum
marg-e-israfil se
is jahan ka vaqt jaise so gaya pathra gaya
jaise koi saari avazon ko yaksar kha gaya
aisi tanhai ki husn-e-tam yaad aata nahin
aisa sannata ki apna naam yaad aata nahin
marg-e-israfil se
dekhte rah jaenge duniya ke aamir bhi
zaban-bandi ke khvab
jis men majburon ki sargoshi to ho
us khudavandi ke khvab
the death of Israphaeli
Leave a Reply