ham ko jahan ki ishrat-o-rahat se kya gharaz
duniya-e-be-sabat ki daulat se kya gharaz
gumnam rahna apne muqaddar men hai likha
ham ko kisi ke gauhar-e-shohrat se kya gharaz
maazi ka talḳh jaam hai apne nasib men
ham ko sharab-e-hal ki lazzat se kya gharaz
ilzam se bache na payambar bhi hai ḳhabar
yaran-e-jahl ki hamen tohmat se kya gharaz
dekhe na koi raushni-e-dil to kya hua
andhe jahan ki andhi basirat se kya gharaz
ham hain alam-nasib masarrat se be-niyaz
ham ko tumhari bazm-e-masarrat se kya gharaz
ham ne hamesha dahr men banTa hai pyaar hi
‘shaghil’ ‘adib’ ham ko adavat se kya gharaz
Leave a Reply