Poet
husn-e-zan kaam liije bad-gumani phir sahi
be-takalluf aur kiije mehrbani phir sahi
aaj jo biiti hai dil par majra us ka suno
dastan-e-ishrat-e-ahd-e-javani phir sahi
zarf se kam vaqt se pahle nahin milti yahan
aaj zahr-e-gham hi pi lo arghavani phir sahi
tegh kis ke haath men thi kaun tha sina-sipar
ye kahani aaj sun lo vo kahani phir sahi
sham-e-fanus-e-talab har rang men raushan rahe
ḳhun-fishani ke maze lo gul-fishani phir sahi
zehn ko manus kar deta hai lafzon ka tilism
mudda.a kah dijiye jadu-bayani phir sahi
kis men himmat hai ‘faridi’ kaun ye un se kahe
muskura kar haal sun lo lan-tarani phir sahi
Leave a Reply