Karamat Bukhari
ḳhudi kam zindagi men gham bahut hain
yahi hai imtihan to ham bahut hain
hamara dard chehre se ayaan hai
hamare dard ke mahram bahut hain
hui hamvar kis se rah-e-hasti
abhi tak is men pech o ḳham bahut hain
zaruri to nahin ik fasl-e-gul ho
junun ke aur bhi mausam bahut hain
bahut hain rone vaale gulsitan par
sharik-e-girya-e-shabnam bahut hain
miri palkon pe raushan hain jo aansu
mujhe ai dida-e-pur-nam bahut hain
nahin ik alam-e-sham-e-juda.i
nazar men aur bhi aalam bahut hain
Leave a Reply