Aslam Noor Aslam
labon par tishnagi ankhon men hai barsat ka aalam
ki tanha kaise guzrega bata jazbat ka aalam
safar ḳhushbu bane aur raste asan ho jaa.en
nigahon men sama jaa.e jo teri zaat ka aalam
bulandi par khaḌe ho kar miyan hairan se kyon ho
samajh men aa gaya shayad anokhi maat ka aalam
juda hona rag-e-jan se bhala asan hi kab tha
mire har har nafas men ghul gaya sakrat ka aalam
agar hain niyyaten shaffaf aur dil men hai gunja.ish
sulajh kar kyuun nahin deta ye uljhi baat ka aalam
main ungli pherta huun jab kabhi bhige se sahil par
bana deta hai tasviren tiri zarrat ka aalam
Leave a Reply