nazar ko phir koi chehra dikhaya ja raha hai
ye tum ḳhud ho ki mujh ko azmaya ja raha hai
bahut asudgi se roz-o-shab kaTne lage hain
mujhe malum hai mujh ko ganvaya ja raha hai
sar-e-mizhgan bagule aa ke vapas ja rahe hain
ajab tufan siine se uThaya ja raha hai
mira gham hai agar kuchh muḳhtalif to is bina par
mire gham ko hansi men kyuun uḌaya ja raha hai
badan kis taur shamil tha mire kar-e-junun men
mire dhoke men us ko kyuun miTaya ja raha hai
vo divar-e-ana jis ne mujhe tanha kiya tha
usi divar ko mujh men giraya ja raha hai
miri ḳhushiyon men teri is ḳhushi ko kya kahun main
charagh-e-arzu tujh ko bujhaya ja raha hai
ḳhirad ki sadgi dekho ki zahir halaton se
miri vahshat ka andaza lagaya ja raha hai
abhi ai bad-e-vahshat is taraf ka ruḳh na karna
yahan mujh ko bikharne se bachaya ja raha hai
Leave a Reply