Mahendra Partap Chand
ranjishon ne jazba-e-iḳhlas garmaya bhi hai
dosti men ham ne kuchh khoya hai kuchh paaya bhi hai
ik zara si baat par kyuun kar ta.alluq toḌ duun
vo purana yaar bhi hai mera ham-saya bhi hai
is taraf dekha to hai be-shak hiqarat se sahi
shukr hai itna karam to is ne farmaya bhi hai
yuun to kuchh qimat nahin jins-e-vafa ki haan magar
jis qadar arzan hai ye itni garan-maya bhi hai
sair phir bhi ho nahin paaya dil-e-iza-talab
vaqt ne ji bhar ke go us par sitam Dhaya bhi hai
hijr ki shab aur yadon ki surur-agin phuvar
kuchh to dil ki be-qarari ko qarar aaya bhi hai
laakh maujon ki bala-ḳhezi ne ki khilvaḌ bhi
us ne kashti ko magar sahil pe pahunchaya bhi hai
phir bhi yarab kya milega hasidon ke shahr men
taaj to shohrat ka tu ne mujh ko pahnaya bhi hai
kyuun na ‘chand’ apni ana ko jaan se rakhun aziiz
ye mira iman bhi hai mera sarmaya bhi hai
Leave a Reply