vo vahāñ ġhair ko mehmān kiye baiThe haiñ
ham yahāñ aish kā sāmān kiye baiThe haiñ
zahar khā leñge shab-e-va.ada na aaoge agar
apnī mushkil ko ham āsān kiye baiThe haiñ
kal shab-e-vasl thī sab aish mayassar the hameñ
aaj ham chaak garebān kiye baiThe haiñ
ishq parde meñ rahe kab talak ai josh-e-junūñ
ham bhī tūfān kā sāmān kiye baiThe haiñ
un kī zulfoñ kā tasavvur bhī ġhazab hai ‘āshiq’
dil ko ḳhud apne pareshān kiye baiThe haiñ