Khushi Mein Yun Izafa Kar Liya Hai

ḳhushi men yuun izafa kar liya hai

bahut sa gham ikaTTha kar liya hai

hamen ham se bachane kaun aata

so ab ḳhud se kinara kar liya hai

miri tanhai ka aalam to dekho

zamane bhar ko yakja kar liya hai

tujhe jaane ki jaldi thi so ḳhud se

tire hisse ka shikva kar liya hai

nahin mangenge tujh ko ab dua men

ḳhuda se ham ne jhagḌa kar liya hai

taraste hain jise milne ki ḳhatir

usi ko apni duniya kar liya hai

vo kya hai ishq ham ne ab ki janan

takalluf men ziyada kar liya hai

andheron men to rakhte hi the ḳhud ko

ujalon men bhi tanha kar liya hai

khule pinjre men bhi jis ko hai vahshat

ye dil aisa parinda kar liya hai

Leave a Comment