mohabbaton ka jo sar par vabal rakkha hai
futur-e-ishq hai aur ham ne paal rakkha hai
ye intiḳhab jo ham ne kiya hai jiine ka
firaq chun liya hai aur visal rakkha hai
kisi bhi roz milo aur udasiyan le lo
ham aise log hain sab pur-malal rakkha hai
ḳhizan ke phuul sanjoe kitab men rakkhe
fasil-e-gham se yuun rishta bahal rakkha hai
vo aḳhirash mujhe ḳhvabon men dekhne aaya
mire gale ka bhi kaisa ḳhayal rakkha hai
ye daur vo hai ki dil men koi rakhe na rakhe
nazar men sab ne mujhe bahr-e-hal rakkha hai
main la-javab hui yuun kuchh us ki baton se
mire saval pe us ne saval rakkha hai
ghazal ke sher mire kab ke mar gae hote
sama.aton ne unhen dekh-bhal rakkha hai
Leave a Reply