Riyaz Latif
hadon ke na hone ki zillat se haare hue
abad ke mujassam kinare hamare hue
nafas ke dayaron men ghola tha ik lams hi
nikal aa.e saare falak se utare hue
ab apni nafi men zara ghota-zan ho hi len
ki sadiyan huiin ḳhud ko ḳhud se ubhare hue
para.i siyahi ki aghosh men kya mile
jo ḳhud dil ki zad par jale vo sitare hue
ḳhuda ki ḳhamoshi men shayad ho us ka vajud
zamana hua naam apna pukare hue
adhure jahanon ke tevar adhure ‘riyaz’
ye sab meri takmil ke isti.are hue
Leave a Reply