ho chuka intizar sone de
ai dil-e-be-qarar sone de
mit gaiin raunaqen charaghon ki
lut gae rahguzar sone de
ahaton ke fareb men mat aa
un ka kya e’tibar sone de
pi liye ansuon ke jaam bahut
tutta hai khumar sone de
tu ne dekhi to hogi sham-e-khizan
ai mariz-e-bahar sone de
unghta hai udaas pedon par
chandni ka ghubar sone de
akhir-e-shab na koi aaega
mere shab-zinda-dar sone de
duur us paar dekhta kya hai
vaqif-e-khu-e-yar sone de
ban gae hain hamare siine men
hasraton ke mazar sone de
Leave a Reply