kab kaha main ne ki tum chahne valon men raho
tum ghazal ho to ghazal ban ke ḳhayalon men raho
husn aisa hai tumhara ki nahin jis ka javab
is liye jan-e-vafa tum to savalon men raho
chhup gaya chand andhera hai bhari mahfil men
tum mire dil men utar jaao ujalon men raho
apni ḳhushbu ko fazaon men bikhar jaane do
phuul ban jaao mahakte hue balon men raho
aane jaane ki kahin tum ko zarurat kya hai
shahr-e-ḳhuban men raho mast ghazalon men raho
umr-bhar ke liye ho jaao kisi ke ‘aḳhtar’
ishq aisa karo duniya ki misalon men raho
Leave a Reply