gulon ko chuum kar aa.i saba si lagti thi
thi ik nazar pe mo.attar hava si lagti thi
main zaḳhm zaḳhm tha lekin gulab hathon men
baḌi thi choT to lekin zara si lagti thi
vo tursh-go lab-e-jan-baḳhsh bhi tha kya kahiye
ki talḳh baat bhi us ki dava si lagti thi
sitam ko husn-e-sitam kar gaya vahi varna
yahi thi zindagi lekin saza si lagti thi
miri taḌap ko samajhta tha ik ibadat vo
mujhe bhi us ki mohabbat dua si lagti thi
chalo vo aankh men paani to de gaya varna
ye saans andhe kuen men sada si lagti thi
Leave a Reply