dilon men aag lagao nava-kashi hi karo
nahin hai shaghl-e-junun kuchh to sha.iri hi karo
ye kya ki baiTh rahe ja ke ḳhalvat-e-gham men
nahin hai kuchh to chalo chal ke mai-kashi hi karo
yahi hunar ka sila hai to naqidan-e-suḳhan
kisi usuul ke parde men dushmani hi karo
sada-e-dil na suno arz-e-hal to sun lo
kahan ye farz hai tum par ki munsifi hi karo
yahi ‘na.im’ bahut hai jo kaaT lo ye raat
ye kuchh zarur nahin hai ki raushni hi karo
Leave a Reply