chand ne apna diip jalaya shaam bujhi virane men
us ki basti duur hai shayad der hai us ke aane men
kya patthar ki bhari sil hai ek ik lamha maazi ka
dekho dab kar rah jaoge itna bojh uThane men
us ko nahin dekha hai jis ne mujh ko bhala kya samjhega
in ankhon se guzarna hoga mere dil tak aane men
apni zaat se kuchh nisbat thi vo bhi is ki ḳhatir se
mera zikr nahin milta hai ab mere afsane men
ek hi dukh tha mera apna vo bhi is ko saunp diya
aḳhir dil ki baat zaban tak aa hi ga.i anjane men
ab to tum bhi jaan ga.i ho tum ko kya sukh milta tha
mere ghar ke kaam men meri maan ka haath baTane men
meri raton men mahke hain jo sapnon ki Daali se
rang hai in phulon ka shamil aaj tire sharmane men
jis se baat bhi karni mushkil vo bhi is mahfil men hai
‘mus.haf’ kaisa lutf rahega us ko sher sunane men
Leave a Reply