koi nahin aata samjhane
ab aram se hain divane
tai na hue dil ke virane
thak kar baiTh ga.e divane
majburi sab ko hoti hai
milna ho to laakh bahane
ban na saki ahbab se apni
vo daana the ham divane
na.i na.i ummiden aa kar
chheḌ rahi hain zaḳhm purane
jalva-e-janan ki tafsiren
ek haqiqat laakh fasane
duniya bhar ka dard saha hai
ham ne tere gham ke bahane
phir vahshat aa.i suljhane
hosh o ḳhirad ke tane-bane
phir apne anchal se hava di
sho.ala-e-gul ko bad-e-saba ne
phir vo Daal ga.e daman men
dard ki daulat gham ke ḳhazane
aaj phir ankhon men phirte hain
ahd-e-tamanna ke virane
phir tanha.i puchh rahi hai
kaun aa.e dil ko bahlane
‘saif’ vo gham bhi tishna-e-ḳhun hai
ham zinda hain jis ke bahane
Leave a Reply