Yar Jab Ham-Kanar Howega

yaar jab ham-kanar hovega

dil ko mere qarar hovega

guzra mujh khaak se jo daman-kash

ye vahi shahsavar hovega

taab kya mah-e-char-dah ko jo tuk

us pari se do-char hovega

mehr us rukh ke aage afsurda

juun charagh-e-mazar hovega

gul nazakat ke aage us ru ke

chashm-e-bulbul men khaar hovega

sarv is qadd-e-rast ke aage

banda-e-chobdar hovega

garche aalam men har koi tera

ashiq-e-gham-gusar hovega

yaad kar ham sa par na kui pyare

fidvi-e-jan-nisar hovega

ai ‘jahandar’ kab vo aina-ru

dekho mujh se do-char hovega

Leave a Comment