zindagi saada varaq par ik hasin tahrir hai
aur ye duniya usi tahrir ki tafsir hai
haq-ba-janib sirf ham hain dusra koi nahin
ḳhud-pasandi ki yahi adna si ik tasvir hai
ye bhi andaz-e-taghaful aur talavvun ki dalil
jo bahut pyara tha ab vo la.eq-e-tazir hai
rahbar milte hain lekin raah dikhlate nahin
manzilon par jo pahunch jaa.e vahi rah-gir hai
zud-ranji bhi ‘vasiyya’ ek aadat hi sahi
ye to batla den ki is men kya miri taqsir hai
Leave a Reply