chhalak rahi hai mai-e-nab tishnagi ke liye
sanvar rahi hai tiri bazm barhami ke liye
nahin nahin hamen ab teri justuju bhi nahin
tujhe bhi bhuul gae ham tiri khushi ke liye
jo tirgi men huvaida ho qalb-e-insan se
ziya-navaz vo shoala hai tirgi ke liye
kahan ke ishq-o-mohabbat kidhar ke hijr o visal
abhi to log taraste hain zindagi ke liye
jahan-e-nau ka tasavvur hayat-e-nau ka khayal
bade fareb diye tum ne bandagi ke liye
mai-e-hayat men shamil hai talkhi-e-dauran
jabhi to pi ke taraste hain be-khudi ke liye
Leave a Reply