aftab-hussain

Ye Jabr Bhi Hai Bahut Ikhtiyar Karte Hue

ye jabr bhi hai bahut ikhtiyar karte hue

guzar rahi hai tira intizar karte hue

kali khili to usi khush-sukhan ki yaad aai

saba bhi ab ke chali sogvar karte hue

tire badan ke gulistan ki yaad aati hai

khud apni zaat ke sahra ko paar karte hue

ye dil ki raah chamakti thi aaine ki tarah

guzar gaya vo use bhi ghubar karte hue

khud apne haath ki haibat se kaanp jaata huun

kabhi kabhi kisi dushman pe vaar karte hue

More Poems

Leave a Comment