main ek ret ka paikar tha aur bikhar bhi gaya
ajab tha ḳhvab ki main ḳhvab hi men Dar bhi gaya
hava bhi tez na thi aur charagh mar bhi gaya
main samne bhi raha zehn se utar bhi gaya
na ehtiyat koi kaam aaya ishq ke saath
jo rog dil men chhupa tha vo kaam kar bhi gaya
ajab thi hijr ki saa.at ki jaan pe ban aa.i
kaḌa tha vaqt vo dil par magar guzar bhi gaya
hava se dosti jis ko tha mashvara mera
usi charagh ki lau se main aaj Dar bhi gaya
kabhi na mujh ko Dara.ega mere batin se
ye ahd kar ke mira a.ina mukar bhi gaya
kinare vaale mujhe bas sada.en dete rahe
bhanvar ko naav bana kar main paar utar bhi gaya
main ḳhak-e-pa sahi kam-tar mujhe na jaan ki main
ghubar ban ke uTha asman par bhi gaya
main apne jism ke andar tha afiyat se magar
lahu ke sail-e-bala-ḳhez men ye ghar bhi gaya
ḳhata ye thi ki main asaniyon ka talib tha
saza ye hai ki mira tisha-e-hunar bhi gaya
Leave a Reply